Мајки

Мајки е македонски филм од 2010 година во режија и сценарио на Милчо Манчевски, снимен во Скопје. „Мајки“ е македонскиот кандидат за номинација за Оскар на 83. доделување на наградите на Академијата.
Филмот е своевиден триптих, во чиј состав влегуваат три различни и една од друга сосема независни приказни. Првата приказна се одвива во СКОПЈЕ. Во фокусот се две деветгодишни девојчиња кои решаваат да пријават манијак во полиција, иако воопшто не го виделе. Втората приказна се одвива во МАРИОВО: новинарска скипа составена од новинар, камерманка и снимач на звук снимаат документарен филм за животот на село на напуштените села во Македонија. Така, се среќаваат со единствените жители на едно напуштено село - брат и сестра на околу 80-90 години, кои се скарани од нивната младост до сега и кои не попуштаат да се помират и покрај тоа што се целосно осамени и во селото и во животот. Третата приказна е фактографска. Овој дел од филмот е со документарен карактер. Станува збор за приказна за познатиот македонски сериски убиец - новинарот Владо Танески од Кичево, кој силувал и убивал пензионирани чистачки.