Морбидизам

„Морбидизам“ е збирка на педесет кратки раскази со бизарни ликови кои завршуваат во чудни и непредвидливи ситуации кога непознатото продира во нивниот живот. Во книгата може да се препознае опсесијата на ликовите на По, лудилото од светот на Лавкрафт, надреалниот апсурд на Кортасар, телесниот хорор на Баркер, отуѓеноста на Кафка, сеништата и покојниците на Мамлеев, авторската автодеструкција на Кинг, Бодлерова фасцинација со естетиката на грдото комбинирано со здрава доза на егзистенционализам, психоанализа, дуализам и кошмарни халуцинации, зачинети со научна фантастика и црн хумор, реализирани во постмодернистички манир. „Морбидизам“ е манифест на македонскиот фантастичен расказ, а неговиот автор е борец за литературата на имагинарното, истражувач во најтемните простори на човечкото постоење, смело откривајќи ги домените на натприродното, необјаснливото, непознатото и забранетото знаење. Хорор преданија раскажани на македонски начин. Педесет кратки и смели литературни бодежи кои никој читател нема да го остават рамнодушен.