СОБРАНИ ДЕЛА том 2: ЏУЏЕСТИ И ДРУГИ НЕОБИЧНИ СКАЗНИ

Вториот том ги содржи трите книги на Стојаноски кои содржат по триесет до четириесет помали сказни, а тоа се Џуџести сказни, Трпкавица в ногавица и Шумски сказни. На крајот на вториот том е објавен и поговор за сите дела од Горјан Петревски, а книгите се илустрирани со цртежи.

Горан Б. Стојаноски на умешен и ненаметлив начин проникнува во тајниот свет на децата и со помош на своите, навистина, необични сказни, создава еден уште понеобичен начин на патување низ разни авантури, за кој децата, секогаш со задоволство читаат, затоа што тие во нив лесно се препознаваат и посакуваат да се најдат во дејството или едноставно, да се идентификуваат со јунаците од овие раскази. Покрај необични случувања препознатливи за детските светови, авторот детето го воведува и во димензиите на паралелното живеење на разните суштества со човечка форма. И тука сè е некако нормално и едноставно, сè е колку интересно, толку и сфатливо и прифатливо, бидејќи и џиновите и џуџињата се исти како и луѓето и се со истите маани или пак доблести...