Најубавите библиски приказни

Зборот „библија“ значи „книга“, а за многумина Библијата е навистина само „Книга“, Книга над книгите која ги има сите рекорди во поглед на бројот на изданија, преводи и печатења во светот. Ова издание на Библијата е посебно и од друг аспект – тоа е збогатено со оригиналните гравури на ненадминатиот илустратор Гистав Доре. Изворните текстови се надополнети со неговите раскошни претстави на најзначајните свети теми, на највозбудливите настани и личности кои се нивни носители. Пред нас оживуваат цела галерија ликови кои ја обележале човековата историја. Благодарение на божјата дарба на Доре, имаме неповторлива можност да уживаме во најинтригантните сцени од постанокот на светот до последниот суд.Библијата е книга која има влезено во темелите на светската култура и цивилизација. Таа е едно од најголемите сведоштва на човечкиот род. Некои во Светото писмо настојуваат да ја пронајдат смислата на својот пат, други во неа бараат само сигурност, а на трети Светото писмо им влева доверба и им го отвора срцето. Некои ја читаат како утеха и предизвик, други како сочувано предание на своите предци.