Ние

„Ние“, напишана во 1920 г., е приказна за тотално организирано општество во кое граѓаните не се личности, туку обични броеви што живеат речиси идентични, регулирани животи. Таквото општество се темели врз идејата дека среќата и слободата заемно се исклучуваат. Метафорично бирократизирајќи ги човечките судбини, Замјатин, на некој начин, го предвидува хоророт на тоталитаризмот (сталинизмот и нацизмот) што ќе претстои во блиска иднина по пишувањето на книгата. Поради острата сатира на тоталитаризмот, романот „Ние“ бил првата книга што била забранета од државната цензура во Советскиот Сојуз, каде што првото издание се појавило дури во 1988 година. Денес, овој роман се смета за класик на дистописката книжевност и за едно од клучните дела на советската и светската книжевност. Ова дело му послужило како инспирација на Џорџ Орвел за неговиот роман „1984“, а извршило големо влијание и врз другите познати дистописки писатели, како: Курт Вонегат и Олдус Хаксли.