Покорување

Секој нов роман на Мишел Уелбек задолжително го следат контроверзии и жестоки реакции. Но последниот роман Покорување овој пат на сцената се појави во уште побизарни околности –  терористичкиот напад на весникот Шарли Ебдо во Париз, токму на денот на објавувањето, кога на насловната страница на весникот беше токму Уелбек и неговиот нов пророчки роман. Во 2022 г. во Франција на власт доаѓа Муслиманското братство и нејзиниот лидер Мухамед Бен Абес. Главниот лик, Франсоа, универзитетски професор, мизантроп и осаменик, со интерес ги следи случувањата, за набрзо, како и остатокот од јавноста, да сфати дека светот во кој живее наскоро брутално ќе се промени. Додека низ Франција избиваат нереди, Франсоа се повлекува во внатрешноста на земјата и чека настаните да стивнат. Тоа патување се претвора во внатрешна одисеја до најмрачните делови на неговата душа, и сурово соочување со фактот дека неговиот живот повеќе нема никаква подлабока смисла.