Принципите на современата реторика

„Принципите на современата реторика“ од рускиот научник – лингвистот и културолог Јуриј В. Рождественски, е респектабилно дело создадено како резултат на истражувањата на теоријата на културата и на современата научна реторика, што ги вршел овој еминентен професор последните две децении на минатиот век на Катедрата по споредбено-историска и општа лингвистика на Московскиот државен универзитет „М. В. Ломоносов“. Овде културата е третирана и како извор на противречности што се јавуваат поради културната нееднаквост, но научната реторика е презентирана како средство за решавање на противречностите. „...Целта на овој труд е да ги формулира општите места карактеристични за масовната комуникација“, пишува авторот во предговорот. „Општите места, карактеристични за усниот, за ракописниот и за печатениот говор се составен дел од современата вербална култура и не може да се игнорираат. Општите места на реториката на масовната комуникација се основа за регулирање на сите видови современи спорови.“