ЕДНА ДРУГА СЕГАШНОСТ

Во книгата раскази „Една друга сегашност“ приказните настануваат случајно во чии ситуации се изненадени и двете страни: читателот и главните протагонисти во расказот и ниту една можност не е отфрлена. Илијовски создава сегашност во сегашноста, како круг во кругот и ги заплеткува нештата до точка на двоумење и истовремено чудење. Често во неговите раскази може да се забележи блага недовршеност што му налага на самиот читател да ја осмислува приказната до посакуваниот крај. „Една друга сегашност“ е книга раскази со надреалистичка, филозофска и еротска содржина. Книгата содржи вкупно 31 расказ. Авторот се осврнува на вечните теми за релативноста на времето, љубовта, смислата на постоењето, егзистенцијалните прашања на еросот и животот во сонот како едно од неодгатнатите психоаналитички прашања. Во расказите на Никола Илијовски најчести ликови се филозофите, митолошките богови, поетите, но и обичните луѓе со нивните стравови, слободни размислувања, желби и егоистични сфаќања. Од долги нарации до кратки спонтани дијалози авторот доловува една паралелна сегашност во оваа постоечката.