Посетата на старата дама; Физичари

Посетата на старата дама е дело во кое авторот преку црн хумор изразува критика на висококапиталистичкиот свет. Централна тема е односот на парите и моќта, од една страна, и човечката деградација во име на стекнување материјални добра, од друга страна. Авторот го разгледува човекот којшто воден од својата потрошувачка страст се сведува на марионета, целосно се обезличува, а сопствените емоции, желби и потреби ги поистоветува со пресметливоста на оние што демонстрираат финансиска моќ. Дејството на драмата Физичари е сместено во приватен санаториум за душевно болни лица, каде што се наоѓаат тројца физичари. Диренмат го користи конкретниот простор на душевната болница како парабола за светот на европската наука од поново време: како свет на апсолутен надзор, експлоатација на луѓето, моќта на профитерите, кои не запираат дури ни пред уништувањето на светот. Типичен пример за парадоксалната логика на современиот свет во кој „лудите“ можат да бидат „мудри“, па сепак не и доволно моќни за да му се спротивстават на злото.