Аполон, водач на македонскиот Бунт

Монографскиот труд „Аполон, водач на македонскиот Бунт“ претставува исклучително важен придонес кон расветлувањето на еден дел од македонското историско минато, во кој централно место заземаат животот и делото на македонскиот патриот Трајко Попов (1910–1946), еден од основачите и водач на илегалното Македонско национално движење – „Бунт“.

Вредноста на овој труд дополнително ја зголемуваат приложените фотографии и факсимили на документи што претставуваат обвинителни акти, пресуди, затворски досиеја, односно подоцнежни наредби за отпуштање од затвор на лицата со кои Трајко Попов ги делел идеалите за обединета и слободна Македонија.

За најдобро да се доловат животот и делото на Трајко Попов, ќе се послужиме со неговите зборови изречени на 25 мај 1945 година: „Со започнување на партизанските борби и со паролата ’за федеративна Југославија‘ за нас беше необјаснива и си поставихме прашањето дали во таја Југославија влагаат Пиринска и Егејска Македонија или само Вардарска. Со тоа ако во неја влага и Грчка Македонија со Пиринска за нас нема друго да постои освен  федеративна Југославија. Ако пак остане само Вардарска, тоа би била непотполна јединица – како мува без глава.“