Човекот кој шета книги

Многу често во хартијата се крие лекот. Понекогаш дури и за нешта за кои човек не ни знае дека му треба лек. Книжарот Карл Колхоф секоја вечер тргнува по живописните улички на градот за да ги однесе нарачаните книги во домовите на своите најверни читачи. Нивното пријателство е посебно – за него тие се како омилените литературни херои, а за нив тој е незаменлива врска со светот.

Но кога стариот сопственик на книжарницата умира, неговата наследничка го укинува таквиот „старомоден“ начин на работа и Книгошетачот ја губи најголемата радост во животот. Единствено смелоста на едно деветгодишно девојче може да ги охрабри Карл и неговите клиенти одново да го откријат патот еден кон друг и кон моќта на зборот.

Трогателна приказна за она што нè сплотува, проникната со љубов и верба во луѓето. Роман за моќта на пишаниот збор и за она што го прави незаменлив чудесниот свет на книгите.

„Топла приказна што ќе ве освои и ќе ви вдахне доверба. Токму она што е потребно секому кој знае колку важна може да биде една добра книга.“ „Бригите“