Драми

Драмата што ја живее нашата генерација носи едно име – МАКЕДОНИЈА. Тоа име е нашата најдлабока суштина, ама и наша болка; наша гордост, но и нашата посраменост; наш занес, но и наше разочарување.

Театарот е вистинското место каде што може да се обедини севкупноста на драмата што ја живееме сега и овде. Кога сме исправени пред некои од најсуштинските прашања на опстанокот на заедницата, секогаш треба да се вратиме на искуствата на нашите предци.

Книгата „Драми“ на Блаже Миневски содржи три нови драмски текстови, во кои, како од архивата на нашата колективна меморија излегуваат идеолозите, џелатите и жртвите, се вртат низ времето како да го загубиле компасот меѓу минатото, сегашноста и иднината, како во киклопска машина за самоуништување во која се вртиме сите заедно и имаме чувство дека нема светлина што ќе ни го покаже излезот. Станува збор за пиесите АЛЕКСАНДРОВ (или А БРЕ М.), СПОРЕД ВИСТИНСКИ НАСТАН и ФОЛК или СУДНИОТ ЛЕТ НА СИЛЈАН И ЏОНАТАН.

Владо Цветановски