Wanted – Вестерн Колекција

Wanted - Вестерн Колекција на Јовчевски е збирка на класични вестерн стрип-минијатури сместени во историската мизансцена од втората половина од XIX век во специфичното и препознатливо опкружување на далечните и сурови предели на американскиот запад. Од прашливте мали гратчиња и нивните гласни салуни полни со соблазливи танчерки, ноќни дами и раскалашени љубители на покерот, вискито и добрата тепачка. Па преку пејсажите кои го отсликуваат селскиот живот во пространите ранчеви со впрегнатите крда од вештите каубои. Или пак етнолошкиот раскош на индијанските села и нивната шаманска мито-поетика на древните ритуали и преданија. Па се до митската и иконичка слика за полуномадскиот скитник каубој како го јава верниот коњ низ пустинските прерии на дивиот запад, препознатлив по стенсоновиот шешир и колт револверите. Токму во ова наративно и сценско опкружување, или вестерн per se, Јовчевски говори за една неповторлива херојска дивина, огромна пожртвуваност и безусловна себепредаденост кон честа и должноста.