Маркетинг менаџмент: Пристап за донесување на стратегиски одлуки

Џон В.Мулинс е вонреден професор по маркетинг менаџмент и претприемаштво на Факултетот за бизнис во Лондон, како дел од Фондацијата „Дејвид и Илејн Потер“. Неговите истражувачки активности се повеќепати наградувани, од кои би ги издвоиле наградите од Институтот за маркетиншка наука, Американската маркетиншка асоцијација и од Фондацијата „Ричард Д.Ирвин“. Орвил К.Вокер помладиот е почесен професор по маркетинг при Универзитетот во Минесота. Покрај тоа што е добитник на повеќе награди, тој е и консултант на голем број компании и непрофитни организации.
Во ова издание авторите ги офатиле темите за улогата на маркетингот при развивањето на успешните деловни стратегии, за анализата на пазарните можности, за развивањето разни стратегиски маркетиншки програми, за развивањето специфични стратегиски маркетиншки програми применливи во одредени ситуации и за имплементацијата и за контролата на тие програми.
Од самиот почеток на книгата може да се забележи дека донесувањето одлуки е критична активност во секоја компанија. Не само маркетинг-менаџерите туку и сите раководни лица во компанијата имаат големо влијание врз тоа колку потрошувачите ќе бидат задоволни со производите или со услугите што ги нуди одредена компанија. Сите обработени теми се одликуваат со три основни карактеристики: фокус на стратегиското донесување одлуки, паметно користење на Интернетот и глобалните перспективи.
За сите подетални информации во врска со содржината и со достапноста на книгата слободно пишувајте на ekonomija@arslamina.com.