Животот на една вљубена жена

Животот на една вљубена жена е најпознатото книжевно дело на Ихара Саикаку. Оваа книга е родоначалник на еден автентичен жанр во јапонската литература наречен „укизоши“ (или приказни за „лебдечкиот свет“ на задоволствата), кој ги обработувал темите застапени во прирачниците за куртизани и водичите за квартовите наменети за уживање. Станувало збор за добро прифатено љубовно или еротско четиво, кое на слободен и отворен начин ги истражува бројните аспекти на човековата сексуалност. Саикаку е одличен познавач на природата на човекот, а во книгата е прикажан цел спектар на социјални слоеви од тогашното јапонско општество, почнувајќи од високите аристократски кругови, преку свештенството, сё до богатите трговци, слугите, куртизаните и просјаците. Неговиот стил на пишување е приемчив, забавен, пријатен, на моменти шегобиен, ироничен, но исто така и мудроносен, афористички, со флуиден, непретенциозен, лежерен тон.