Ова е моето последно молчење

             „Ова е моето последно молчење“ има за цел да ги претстави современите македонски поетеси кои активно творат во последниве десетина години.             Станува збор за панорамски преглед со избор од неколку песни кои најдобро ќе го претстават личниот севкупен поетски печат на авторките, од поетеси од различни генерации, активни на сцената со по неколку објавени авторски книги поезија на македонски јазик. „Ова е моето последно молчење“ не претставува селективно групирање на авторски дела со слична и обединувачка естетска или тематско-мотивска нишка, туку ги обединува во една интензивна книга колешките по перо и, како што ги нарекува феминистичката критика, „сестрите по род“, со веќе докажана естетска и книжевна вредност, во заедничко дело кое ќе претставува глобално огледало на женското писмо во XXI век во Македонија, наместо персонално претставување на одбран број авторки.             Ваков тип книга не е битен само од книжевен и родов аспект, туку и од национален и со нејзино објавување Македонија ќе може да застане рамо до рамо со останатите современи и напредни земји, кои функционираат не само демократски, туку и демократско-родово, бидејќи овој тип обединувачки зборници се историско-културолошки неопходни.