Тајна мисија

Тајна мисија донесува дваесет и еден расказ, кои на најдобар начин ја покажуваат умешноста на Влада Урошевиќ во формата што можеби најмногу му одговара: краткиот расказ. Станува збор за текстови во кои авторот го продолжува својот интерес за фантастиката, за необичното и чудесното во литературата. Истовремено, во книгата Урошевиќ уште еднаш ја потврдува својата супериорност кога станува збор за пишување раскази во чие средиште се наоѓа приказната – во манир на голем мајстор за раскажување тој владее со сите клучни аспекти на приказната, од поставувањето на атмосферата, карактеризацијата и односите меѓу ликовите, третманот на деталите, до развојот на дејството, заплетот и кулминацијата, која често изненадува, но никогаш не е немотивирана и не ја изневерува логиката на расказот.

 Раскажувањето е радост, смета Урошевиќ. Постојаното смислување и раскажување приказни што како искривено огледало се однесуваат кон светот, искривено огледало во кое тој попрецизно се одразува отколку во она другото, обично огледало во кое сè е толку јасно, видливо, точно... па поради тоа сосема лажно.