Опседната куќа

Опседната куќа ги содржи најинтригантните раскази на Вулф кои и денес предизвикуваат голем интерес меѓу проучувачите на литературата. Видлива е нејзината голема самокритичност кон текстовите, во нив нема збор отповеќе или непрочистена мисла. Тие се повеќеслојни, изобилуваат со алузии и недоречености. Во нив се испреплетуваат сегашноста и минатото, низ интересни реминисценции што брзаат да бидат искажани, да го најдат своето место на страниците на книгата. Богатиот дух на Вулф создава ликови кои не можат да се ослободат од своето минато, од својата судбина, од онаа предодреденост против која, ни се чини, не можеме да се бориме. Затоа и припадничките на Женскиот клуб се разочаруваат во своите идеали, а собирачот на необични стари предмети бидува отфрлен од своите пријатели. Вирџинија Вулф го покажува светот виден низ женските очи и докажува дека нема машки и женски интелект. Нејзината фикција се развива во серија брилијантни и исклучителни експерименти, во потрага по нов начин на изразување на врската помеѓу животот на поединецот и моќта и влијанието на општеството и на историјата.