Срамота

Срамота од Џон М. Куци е роман што тешко се заборава. Вознемирувачката приказна за тричлената банда што ја силува ќерката на посрамотениот професор и книжевник Дејвид Лури останува длабоко врежана во сеќавањето на читателот, речиси како физичка рана. Овој мајсторски приказ за приватното и јавното посрамотување и каење, претставено низ духовното и физичкото патешествие на контроверзниот протагонист Дејвид Лури, има и политички и интимен карактер.

Ова исклучително, повеќеслојно, комплексно, стилски и јазично беспрекорно книжевно дело е добитник на Букеровата награда во 1999 година. Со тоа Куци станува прв писател што ја добил оваа награда двапати, имајќи предвид дека во 1983 му е доделена за романот Животот и времињата на Мајкл К. По ваквиот успех, Куци ја добива и Нобеловата награда за литература во 2003 година.

Како еден од најдобрите романи на Куци, Срамота несомнено ќе остане меѓу најмаркантните и најпотресните книжевни дела на XX век.

„Куци успева да создаде роман кој е истовремено и студен и насилен, и исклучително напишан и временски совршено темпиран.... Срамота е непријатна, но многу важна книга.“

„На Куциевото познавање на книжевната техника му нема рамно, неговата сериозност е непобитна, тој е еден од интелектуално најпрефинетите романсиери што пишуваат денес.“