Дон Кихот

Сликовницата "Дон Кихот" од Мигел де Сервантес е првото издание на штотуку оформената издавачка куќа "Ротко книги и музика" од Скопје, околу која гравитираат група млади македонски автори од различни сфери на уметноста.

Дон Кихот е проект на триото Виктор Ирвин Иванов, уредник и издавач, Калија Киселички, автор на адаптацијата на оригиналниот текст и Марко Јанев, автор на ликовните илустрации.

Оваа македонска верзија на Дон Кихот е наменета за сите генерации, со особен фокус на децата од 7 до 12 годишна возраст, како примарна целна група.

Изработена е на ниво на елитно издание, што илустрациите на Јанев во потполност го заслужуваат. Отпечатена е на екслкузивна хартија и брои четириесетина страници под екслузивниот тврд повез. Напишана е на стандарден, современ македонски јазик, со наративна конструкција блиска до актуелните генерации. Изданието подразбира десет поглавја, со ист број на илустрации, преку кои се претставени највечатливите моменти од авантурите на Дон Кихот и неговиот сопатник Санчо Панса.

Овој бесценет бестселер со векови е четиво за многу генерации, една од првите средби на децата со жанрот фантастика, но и клучалка низ која се наѕира светот на возрасните, мечтите, фрустрациите, неостварената љубов, промашениот живот, дури и смррта се опишани на начин да бидат лесно и безболно асимилирани и од најмладите генерации.