Избрани песни

Стиховите се мојата врска со времето, со новиот живот на мојот народ Ана Ахматова, наречена кралица на руската поезија, пленува со своето мајсторство, префинетиот лиризам, лексичкото изобилство и чудесните поетски форми. Позната како претставник на акмеизмот, таа со својата драматично напната, психолошки длабока, а навидум крајно лаконска поезија, ги надминува неговите програмски насоки. Голем талент, со остар и јасен ум, Ахматова стоички ги издржува сите искушенија прераснувајќи во сведок на едно време кое можело да се преживее единствено со љубов – кон блиските, кон животот и зборот, кон татковината. „Јас никогаш не престанав да пишувам“, вели Ахматова. „Така живеев со ритмите што звучеа во херојската историја на мојата земја. Среќна сум што живеев во тие години и што видов неспоредливи настани.“ Од нејзиното богато творештво издвоивме песни создавани од 1909 до 1969 година. Зад секој нејзин стих стои вистината на времето, сопственото и историското. Па дури и ова што денес го живееме. Мало но значајно енциклопедиско издание за секој вљубеник во убавиот збор.